electroneddas

Ap'a essi dromiu, ma ancora no ddu connoscemu custu giassu. Mancai calincunu mi nd'iat chistonau, antzis certamenti, perou sceti oi nci seu incapitau.
Seu chistionendi de www.sardegnadigitallibrary.it
Nc'est unu mesu muntoni'e cosa. Poita mesu? Poita nc'est pruscatotu cosa logudoresa e barbaricina. Nc'est genti chi pensat ca sa Sardinnia siat sceti ingunis, ca in su Campidanu, in su Surcis e in totu sa Sardinnia meridionali seus bonus sceti a fai trallalleras. Poita no nc'ant postu nemmancu una gara campidanesa?

Comunque cosa bona nci nd'est e meda puru.
Innoi agatai una sonada de Tziu Luigi Lai (chini dd'iat bisitada sa mostra in su casteddu 'e Santu Miali (2002?) si nd'at a arregodai siguramenti. Fiat intreressanti, cudda mostra: una dì o s'atra si dd'apu a contai, ca, a nci pensai, at cuntribuiu issa puru a formai is eletroneddas)

Cincuant'annus fait, fiat su princìpiu de su 1958, is Stadus Unidus teniant .. pibiri!
Fiat ca s'URSS dd'iat pigaus in contropiede, ponendi in orbita su primu satelliti artificiali de s'istoria, su Sputnik, su 4 de mes'e Ladamini 1957

Intzandus si depiant movi issus puru, no podiant abarrai a coa. Iant duncas fatu s'"explorer 1", postu in orbita su 31 gennàrgiu 1958

E ita at a nc'intrai, eis a nai, cun is eletroneddas?
Est ca sa cantzoni chi sighit dd'apu batiada "Sputnik"

Mancai totu su chi si podit nai apitz'e s'URSS, a su mancu poniat frenu a s'ambitzioni de is USA.
Ita sutzèdiu sentz'e custu frenu ddu bieus donnya dì, in Iraq, in Afganistan ma innoi puru, ca si (po malasorti) eis a allui sa TV, su 99% de su chi nci passat est, diretamenti o indiretamenti, fatu in USA, est a nai ca funt dinai ca ddoi andant in continuatzioni.
Comunque, ascurtai e criticai