electroneddas

Ap'a essi dromiu, ma ancora no ddu connoscemu custu giassu. Mancai calincunu mi nd'iat chistonau, antzis certamenti, perou sceti oi nci seu incapitau.
Seu chistionendi de www.sardegnadigitallibrary.it
Nc'est unu mesu muntoni'e cosa. Poita mesu? Poita nc'est pruscatotu cosa logudoresa e barbaricina. Nc'est genti chi pensat ca sa Sardinnia siat sceti ingunis, ca in su Campidanu, in su Surcis e in totu sa Sardinnia meridionali seus bonus sceti a fai trallalleras. Poita no nc'ant postu nemmancu una gara campidanesa?

Comunque cosa bona nci nd'est e meda puru.
Innoi agatai una sonada de Tziu Luigi Lai (chini dd'iat bisitada sa mostra in su casteddu 'e Santu Miali (2002?) si nd'at a arregodai siguramenti. Fiat intreressanti, cudda mostra: una dì o s'atra si dd'apu a contai, ca, a nci pensai, at cuntribuiu issa puru a formai is eletroneddas)

Femus nendi chi su micròfonu depit essi s'origa chi ascurtat i arregistrat. Tocàt duncas a scioberai aundi est su mellus logu po ascurtai beni una sonada de launeddas.

Est utili a fai su paragoni cun cancunu chi est fueddendi e nosu chi ddu depeus ascurtai.



Poita no si poneus a palas de cancunu po dd'ascurtai? mancai dd'eus a intendi a su pròpriu, ma no beni meda.
Duncas su micròfonu no bandat postu asuta 'e is launeddas, commenti a bortas faint is sonadoris, mascamenti in prucessioni. Est prus simpli, ma su sonu chi pigat no est cussu chi emus a intendi postus a innantis de su sonadori.
Torrendi a cuss'òmini chi est fueddendi: dd'imbaraus s'origa a sa schina, a sa manera de su dotori po auscultai? de aici puru dd'emus a intendi, ma no  in d-una manera naturali, est a nai commenti dd'emus a intendi normalmenti.
Parint cosas strollicas, chistionendi de personas, ma po is launeddas capitat custu puru. Duncas no banda beni a ponni su microfonu imbarau asuba de is cannas.

Su micròfonu depit essi innantis de "sa buca" de is launeddas
Ma cali dimòniu est sa buca de is launeddas?

In realidadi de buca no nci nd'est una sceti, nci ndi funt assumancu undixi: ma nd'eus a chistionai prus a bàsciu.
Cummentzaus cun sa cosa prus fàcili: su tumbu.
Est craru ca su sonu 'essit mascamenti de sa parti bàscia, aundi  sa canna est oberta.
Perou .. cali est sa mellus distàntzia anca nci ponni su micròfonu?
Custu dipendit de unu muntoni de fatoris. Nci funt de dognia manera una lista de chistionis:
Tropu acanta no podit essi: su micròfonu iat a pigai una pressioni tropu manna e duncas iat a funtzionai mali; in prus s'iat a podi intendi su sùlidu de s'aria chi atumbat contra a su micròfunu.
Tropu atesu no podit essi: su sonu s'iat a disperdi in s'airi, i iat podi pigai atrus sonus de s'ambienti chi iant podi strobbai.

Custa chistioni est meda importanti, ca s'at a serbiri prestu.
Sa "potentzia" de su sonu diminguit cun d-una lei cuadratica, est a nai ca, si a unu metru de distantzia teneus una potentzia 1, a dus metrus eus a tenni una potentzia 1 / 2*2 (unu cuartu), a tres metrus 1/3*3 (unu nonu) etc.

Duncas sa distàntzia giusta dipendit de is carateristicas de su micròfonu: tòcat a fai unas cantu provas.

Candu si tratat de amplificai sa mancosa o sa mancosedda, su discursu s'atropeliat unu paghixeddu. De undi ndi 'essit su sonu? Torrendi a chistionai de bucas, cali funti?

Sa prus parti de su sonu at a bessiri de sa primu crai chi abarrat oberta; deghinò, at a bessiri de s'arrefinu. S'immàgini a manu manca inditat, in d-una manera cualitativa, sa propagatzioni de is undas sonoras chi bessint de una crai.




S'immagini chi sighit ammostat invecias sa situatzioni chi eus a oteni ponendi su micròfonu "a cudda manera", sentz'e arrexonamentu perunu.

Is lignas inditant sa distàntzia chi nc'iat a essi intra is crais e su micròfonu. Chi duncas faeus s'ipòtesi chi sa potentzia de su sonu chi essit de dognia crai siat sa pròpriu (prus o mancu est deaici), bieus perou chi su tretu chi su sonu depit fai po lompi a su micòfunu est differenti: su tretu partendi de s'arrefinu est aggiumai tres bortas su tretu partendi de sa primu crai.
Po su chi eus biu a coa, custu bolit nai ca s'intensidadi de su sonu iat a essi 3 x 3 =9 bortas prus pitica (aprossimendi unas cantu chistionis, de dognia manera po immoi banda beni deaici).
Arregistrendi, eus a intendi meda prus a forti is notas chi correspundint a is crais prus acanta a su mic.
Chi 'oleus duncas unu livellu prus pagu differenti intra is crais, depeus cicai de imponi chi su tretu siat su pròpriu po dognia crai.
Ovviamenti no est possìbili: perou si nci podeus acostai meda.
Intantis sa mellus situatzioni est sa chi bieus in s'immàgini chi sighit:


Sa distantzia intra s'arrefinu e sa prumu crai bolit pratzia a metadi.

Immoi abbisòngiat scioberai sa distàntzia verticali, est a nai sa distàntzia de sa canna. Castiai custas dus immàginis:




Cali est sa situatzioni prus ùtili? Chi pensais torra a su chi eus nau, eis depi arrespundi ca cussa asuba: est ca is differentzias intra is tretus funt prus piticas. Chi castiaus infatis sa figura prus in bàsciu, bieus ca su tretu prus longu (cussu arràbiu craru) est su dòppiu de cussu prus crutzu (arrùbiu), mentris in s'atra figura sa differentzia est pitica, atesu meda de su dòppiu.
Duncas iat a essi mellus a poni su micròfonu prus atesu possibili de sa canna; torraus perou a su chi eus biu po su tumbu: tropu atesu no fait, ca su sonu s'iat a disperdi prima de nci lompi.
Candu si fait unu progetu (cioè in sa vida reali) no esistit sa solutzioni perfeta, che in matemàtica. Si tratat sempri de scioberai, ca no esistit sa solutzioni perfeta.

Cun sa teoria eus acabau: in su pròssimu post s'apu a fai bì s'esperimentu chi seu fendi.
Chi teneis curiosidadis o nc'est calincuna cosa chi no est crara, naraimiddu.

Cummentzaus de su princìpiu.
Is launeddas funt unu strumentu acùsticu, est a nai ca prodùsint, in basis a is leis de sa fisica e in particulari de s'acùstica, undas sonoras.

Su problema de s'amplificatzioni est a pigai custas undas e a ddas ammanniai, sentza perou de ddas cambiai. No depeus pigai allu e fai cibudda, po cantu manna.
S'aina chi permitit de sapiri is undas sonoras ddu nant micròfonu.
Su micròfonu est duncas importanti meda, ca at a essi s'origa chi at a permiti s'amplificatzioni: intzandus abbisongiat chi siat de calidadi.

Segundu s'imperu chi eus a depi fai de cust'amplificatzioni, eus a depi scioberai intra sa calidadi de su sonu chi oleus oteni, e duncas de is micròfonus chi eus a imperai, e sa possibilidadi de si podi tragai totu su carramatzimini a giru, po prucessionis o atrus imperus "in motu", renuncendi duncas a unu sonu prus fideli po unu sistema de amplificatzioni prus lèbiu.

Duncas, chi depeus fai un'amplificatzioni "de arruga", eus a scioberai micròfonus mancai prus pagu sensibilis e de prus pagu calidadi, chi perou funt prus piticheddus e lèbius.
Chi invecias depeus arregistrai unu CD o de donnya manera no s'interessat s'imbàlliu ma sa calidadi de su sonu, eus a pigai micròfonus prus sensibilis ma mancai prus grais.

Aundi ddus depeus ponni a custus micròfonus? No est domanda facili!
Chi no est custa sa cosa prus importanti po un'amplificatzioni bona, seguramenti est sa segundu.
Chi su micòfonu ddu poneus a unu metru o a dexi metrus, s'efetu chi eus a oteni no at a essi su pròpriu. Aici sighendi chi poi ddu poneus a innantis, a palas, asuba o asuta de is launeddas.